- अर्घाखाँचीको भूमिकास्थान–४ मा दोबानखोला लिफ्टिङ खानेपानी आयोजना सम्पन्न भई हस्तान्तरण गरिएको छ।
- UNDP र आरएन संस्थाको सहयोगमा निर्माण भएको यस आयोजनाबाट ३३५ घरधुरी लाभान्वित भएका छन्।
- खानेपानीको समस्या समाधान भएपछि स्थानीय बासिन्दा हर्षित हुँदै आयोजना निर्माणमा संलग्न सबैप्रति आभार प्रकट गरेका छन्।
लक्ष्मण सुनार
नेपाल प्रेसखबर
भूमिकास्थान (अर्घाखाँची), शुक्रबार, साउन १६, २०८३
अर्घाखाँचीको भूमिकास्थान नगरपालिका–४ धारापानीमा निर्माण सम्पन्न भएको दोबानखोला लिफ्टिङ खानेपानी आयोजना एक समारोहबीच हस्तान्तरण गरिएको छ।
संयुक्त राष्ट्रसंघीय विकास कार्यक्रम (UNDP) र आरएन (RN) संस्थाको सहयोग तथा समन्वयमा सम्पन्न उक्त आयोजनाबाट हाल ३३५ घरधुरी प्रत्यक्ष रूपमा स्वच्छ खानेपानी सेवाबाट लाभान्वित भएका छन्।
हस्तान्तरण कार्यक्रममा भूमिकास्थान नगरपालिकाका नगरप्रमुख झविलाल थापा, उपप्रमुख बालकृष्ण बन्जाडे, वडा नं. ४ का वडाध्यक्ष बाबुराम सुनार, वडा नं. ३ का वडाध्यक्ष कृष्ण बन्जाडे, दोबानखोला लिफ्टिङ खानेपानी उपभोक्ता समितिका अध्यक्ष झविन्द्र चुदाली, वडा नं. ४ की सचिव नीलम शाही, वडा कार्यालयका कर्मचारी तथा जनप्रतिनिधिहरूको उपस्थिति रहेको थियो। साथै विभिन्न सामाजिक तथा स्थानीय क्षेत्रका व्यक्तिहरूको पनि उल्लेखनीय सहभागिता रहेको थियो।
कार्यक्रमको सञ्चालन मणि कुँवरले गर्नुभएको थियो। कार्यक्रममा सहयोगी संस्था UNDP र RN का प्रतिनिधिहरूलाई स्थानीयवासीको तर्फबाट भव्य स्वागत तथा सम्मानसमेत गरिएको थियो।
स्थानीयवासीहरूले आयोजना सञ्चालनमा आएपछि वर्षौंदेखिको खानेपानी अभाव अन्त्य हुने विश्वास व्यक्त गर्दै सहयोगी संस्था, जनप्रतिनिधि तथा आयोजनामा प्रत्यक्ष–अप्रत्यक्ष रूपमा योगदान गर्ने सबैप्रति आभार प्रकट गरेका छन्।
यस आयोजनाले धारापानी क्षेत्रका बासिन्दालाई सुरक्षित र नियमित खानेपानी उपलब्ध गराउने अपेक्षा गरिएको छ।
