- देशभर मनसुन सक्रिय रहेकाले आज पनि अधिकांश क्षेत्रमा वर्षाको सम्भावना छ।
- कोशी, बागमती र गण्डकी प्रदेशका केही स्थानमा भारीदेखि अति भारी वर्षा हुन सक्छ।
- नदी तटीय क्षेत्र तथा पहिरोको जोखिम भएका स्थानमा सावधानी अपनाउन आग्रह गरिएको छ।
असार २९ प्रकाशित समाचार नेपाल प्रेस खबर काठमाडौँ
मनसुन सक्रिय: आज पनि देशभर वर्षाको सम्भावना, केही स्थानमा भारीदेखि अति भारी वर्षाको चेतावनी
काठमाडौं। देशभर मनसुनी वायु सक्रिय रहेकाले आज पनि अधिकांश क्षेत्रमा वर्षाको सम्भावना रहेको छ। जल तथा मौसम विज्ञान विभागअन्तर्गत मौसम पूर्वानुमान महाशाखाका अनुसार हाल मनसुनको न्यून चापीय रेखा सरदर स्थानभन्दा केही माथि नेपालको तराई भू–भाग नजिक रहेकाले मौसममा बदलीसँगै वर्षा भइरहेको छ।
हाल देशभर अधिकांश स्थानमा बदली रहेको छ भने कोशी, बागमती, गण्डकी, लुम्बिनी र कर्णाली प्रदेशका केही स्थान तथा मधेश र सुदूरपश्चिम प्रदेशका एक–दुई स्थानमा हल्कादेखि मध्यम वर्षा भइरहेको महाशाखाले जनाएको छ।
आज दिउँसो कोशी, मधेश, बागमती, गण्डकी र लुम्बिनी प्रदेशमा अधिकांश स्थानमा तथा कर्णाली र सुदूरपश्चिम प्रदेशमा आंशिकदेखि सामान्य बदली रहनेछ।
कोशी, बागमती र गण्डकी प्रदेशका धेरै स्थान तथा मधेश, लुम्बिनी, कर्णाली र सुदूरपश्चिमका केही स्थानमा मेघगर्जन र चट्याङसहित वर्षाको सम्भावना रहेको छ।
महाशाखाका अनुसार कोशी, बागमती र गण्डकी प्रदेशका पहाडी क्षेत्रका केही स्थान तथा मधेशसहित कोशी, बागमती र गण्डकीका तराईका एक–दुई स्थानमा भारी वर्षा हुने सम्भावना रहेको छ।
रातिको समयमा पनि देशका अधिकांश क्षेत्रमा बदली कायम रहनेछ। कोशी र बागमती प्रदेशका केही स्थानमा भारीदेखि धेरै भारी वर्षा तथा पहाडी भू–भागका एक–दुई स्थानमा अति भारी वर्षा हुने सम्भावना रहेको महाशाखाले जनाएको छ। साथै गण्डकी र लुम्बिनी प्रदेशका केही स्थानमा पनि भारी वर्षाको सम्भावना रहेको छ।
महाशाखाले भारी वर्षाको सम्भावना रहेका क्षेत्रमा नदी–नाला आसपास, पहिरोको जोखिम भएका स्थान तथा डुबान हुन सक्ने क्षेत्रका बासिन्दालाई आवश्यक सतर्कता अपनाउन आग्रह गरेको छ।
