- असार ५ गते नेपाल प्रवेश गरेको मनसुन १२ दिनपछि देशभर फैलिएको छ।
- यस वर्ष औसत समयभन्दा ६ दिन ढिलो गरी मनसुन पूर्ण रूपमा सक्रिय भएको हो।
- देशभर मनसुन सक्रिय भएसँगै अब पश्चिमी वायुको प्रभाव पूर्ण रूपमा हटेको छ।
काठमाडौं, असार १६
पूर्वी नेपालबाट असार ५ गते प्रवेश गरेको मनसुन १२औँ दिनमा देशभर फैलिएको छ। जल तथा मौसम विज्ञान विभागका अनुसार औसत मितिभन्दा ६ दिन ढिलो नेपाल प्रवेश गरेको मनसुन मंगलबारदेखि देशका सबै भू–भागमा सक्रिय भएको हो।
विभागका अनुसार मनसुन प्रवेश गरेको चौथो दिनमै कोशी, मधेश र बागमती प्रदेशका सबै क्षेत्र तथा गण्डकी र लुम्बिनी प्रदेशका केही भू–भागमा फैलिएको थियो। त्यसपछि केही दिन गण्डकी र लुम्बिनी प्रदेशका केही क्षेत्रमा मनसुन विस्तारको गति सुस्त बनेको थियो।
सामान्यतया नेपालमा मनसुन प्रवेश गरेपछि देशभर फैलिन करिब एक साताको समय लाग्ने भए पनि यस वर्ष भने देशभर फैलिन १२ दिन लागेको विभागले जनाएको छ।
हाल देशका सबै भू–भागमा मनसुन सक्रिय भएसँगै पश्चिमी वायुको प्रभाव हटेको छ। विभागका अनुसार नेपालबाट मनसुन बाहिरिने औसत समय अक्टोबर २ (असोजको तेस्रो सातातिर) रहेको छ।
