काठमाडौँ । अर्घाखाँचीबाट निर्वाचित प्रतिनिधिसभा सदस्य हरिप्रसाद भुसालले जिल्लाका महत्त्वपूर्ण विकास आयोजनाहरू अलपत्र परेको भन्दै सरकारको ध्यानाकर्षण गराएका छन् । बुधवार बसेको प्रतिनिधिसभा बैठकमा बोल्दै उनले अर्घाखाँची तीन वर्षसम्म सांसद विहीन हुँदा विकासका काम ठप्प भएको बताए ।
बैठकमा बोल्दै भुसालले नौमुरे आयोजना, अर्घा भगवती विमानस्थल, सडक पूर्वाधार, सिँचाइ र खानेपानीको दर्जनौँ आयोजनाहरू बजेट र रेखदेखको अभावमा अलपत्र परेको उल्लेख गरे । निर्माणाधीन विमानस्थल अहिले गौचरणमा परिणत भएको र खानेपानीको ट्याङ्कीहरू फुट्न थालेको उनले बताए । ‘पाइपमा पानी होइन, कमिला हिँड्न थालेका छन् ।
यो गुनासो कहाँ गएर सुनाउने सभामुख महोदय ?’ उनले प्रश्न गरे ।सांसद भुसालले जिल्लामा वन्यजन्तुको आतङ्कका कारण नागरिकहरू विस्थापित हुने अवस्था आएको समेत बताए । सबैतिरबाट खेदिएका अर्घाखाँचीबासीलाई अहिले बाँदर र बँदेलले घरबाटै खेद्न सुरु गरेको उनको भनाइ थियो ।किसानको पीडा सुनाउँदै उनले भने, ‘पहिलो कुरा चराले खेती उम्रन दिँदैन, जेनतेन उम्रिए मृगले हुर्कन दिँदैन ।
जसोतसो हुर्किए बँदेलले फल लाग्न दिँदैन र भाग्यले फल लागिहाले बाँदरले पाक्न दिँदैन । उनले वन्यजन्तुको समस्या समाधान गर्न र अलपत्र परेका विकास निर्माणका कामलाई तत्काल अगाडि बढाउन सरकारसँग माग गरे ।
