नेपाल प्रेसखबर | नवलपरासी पूर्व
पूर्वी नवलपरासीको हुप्सेकोट गाउँपालिका–६ स्थित घाँगी भीरबाट करिब ६ महिनादेखि निरन्तर धुवाँको मुस्लो निस्किरहेको छ। जमिनमुनिबाट निस्किरहेको धुवाँको कारण अहिलेसम्म स्पष्ट हुन नसक्दा स्थानीय बासिन्दा त्रसित बनेका छन्।
पेलेगा र भडारी गाउँको बीचमा पर्ने पहाडी क्षेत्रमा करिब दुई वर्षअघि पहिरो गएको थियो। सोही क्षेत्रबाट गत चैतदेखि निरन्तर धुवाँ निस्किरहेको स्थानीयले बताएका छन्। पछिल्लो समय धुवाँ बाक्लिँदै गएपछि घटना थप चर्चामा आएको हो।
स्थानीयका अनुसार धुवाँसँगै कहिलेकाहीँ पिरो तथा असामान्य गन्ध आउने गरेको छ। धुवाँ निस्किरहेको आसपासमा सुकेको घाँस तथा दाउरा राख्दा आफैँ आगो बल्ने गरेकोसमेत स्थानीयको भनाइ छ। केही स्थानमा जमिन तथा वनस्पति पोलिएको देखिएको बताइएको छ।
धुवाँ निस्किरहेको स्थानबाट करिब ५०० मिटर आसपास पेलेगा गाउँ रहेको र त्यहाँ करिब ४४ घरधुरी बसोबास गर्ने बताइएको छ। लामो समयदेखि धुवाँ नरोकिएपछि स्थानीयले बस्तीको सुरक्षाबारे चिन्ता व्यक्त गरेका छन्।
सामाजिक सञ्जालमा यसलाई ज्वालामुखी वा ज्वालामुखी गतिविधिको संकेत हुनसक्ने भन्दै विभिन्न चर्चा भइरहे पनि यसको वैज्ञानिक पुष्टि भने भइसकेको छैन।
घटनाको वास्तविक कारण पत्ता लगाउन खानी तथा भूगर्भ विभागले स्थलगत अध्ययनका लागि विज्ञ टोली पठाउने तयारी गरेको छ। विभागका विज्ञ प्रकाश लुइँटेलको नेतृत्वमा तीन सदस्यीय टोलीले घाँगी भीरको स्थलगत अध्ययन तथा अनुसन्धान गर्ने जनाइएको छ।
हुप्सेकोट गाउँपालिकाले पनि घटनालाई सामान्य रूपमा नलिई आवश्यक अध्ययन तथा समाधानका लागि सम्बन्धित निकायसँग समन्वय गरिरहेको जनाएको छ। यस क्षेत्र नजिकै धौवादी फलामखानीसमेत रहेकाले जमिनमुनिबाट धुवाँ निस्कनुको कारणबारे वैज्ञानिक अध्ययन आवश्यक देखिएको छ।
यसअघि पनि करिब १८ वर्षपहिले सोही क्षेत्रको अर्को भागबाट लामो समयसम्म धुवाँ निस्किएको स्थानीयले बताएका छन्। अहिले फेरि अर्को स्थानबाट धुवाँ निस्किएपछि स्थानीयमा थप चासो र त्रास बढेको हो।
वैज्ञानिक टोलीको स्थलगत अध्ययनपछि मात्रै धुवाँ निस्कनुको वास्तविक कारण र यसले बस्तीमा पार्न सक्ने जोखिमबारे स्पष्ट हुने अपेक्षा गरिएको छ।
समाचार स्रोत: विभिन्न सार्वजनिक रिपोर्ट तथा स्थानीय विवरण।
