नेपाली कांग्रेसका महामन्त्री प्रदीप पौडेलले सार्वजनिक बिदाका दिन सरकारी अस्पतालमा ओपीडी सेवा बन्द हुँदा बिरामीलाई समस्या बढेको भन्दै सरकारको ध्यानाकर्षण गराएका छन्। उनका अनुसार ओपीडी सेवा अवरुद्ध हुँदा स्वास्थ्य सेवाको पहुँच कमजोर बनेको र बिरामीमाथि अतिरिक्त आर्थिक बोझ थपिएको छ।
पौडेलले आफू स्वास्थ्य मन्त्रालयमा रहँदा अतिरिक्त समय काम गर्ने चिकित्सक तथा स्वास्थ्यकर्मीलाई प्रोत्साहन दिएर बिदाका दिनमा पनि सेवा सञ्चालन गर्ने व्यवस्था अघि बढाइएको स्मरण गराए। सरकारी अस्पतालमा बढ्दो भीडलाई व्यवस्थापन गर्न ओपीडीलाई दुई सिफ्टमा सञ्चालन गर्ने र सेवा समय विस्तार गर्ने काम सुरु गरिएको पनि उनले बताए।
त्यसैगरी, स्वास्थ्यकर्मीका लागि प्रोत्साहन भत्ता, २५०० नयाँ जनशक्ति थप गर्ने प्रक्रिया र सेवा सुधारका योजना अघि बढाइएको उल्लेख गर्दै उनले ती सुधारलाई निरन्तरता दिन सरकारलाई आग्रह गरेका छन्। महामन्त्री पौडेलले सरकारी स्वास्थ्य सेवालाई प्रभावकारी बनाउँदै निजी क्षेत्रसँग सहकार्य गरेर मात्र नागरिकमैत्री स्वास्थ्य प्रणाली सम्भव हुने धारणा व्यक्त गरेका छन्।
