- अर्घाखाँचीको सन्धिखर्कमा किसानका लागि आएको अनुदानको मल अवैध रूपमा बिक्री गरेको आरोपमा एग्रोभेट सञ्चालक पक्राउ परेका छन्।
- नयाँ नेपाल एग्रोमार्टका सञ्चालक युवराज पौडेललाई प्रहरीले नियन्त्रणमा लिई अनुसन्धान सुरु गरेको छ।
- जिल्ला अदालतबाट म्याद थप गरी घटनाबारे थप कानुनी कारबाही अगाडि बढाइएको प्रहरीले जनाएको छ।
नेपाल प्रेस खबर
अर्घाखाँची, असार ५, २०८३
अर्घाखाँचीको सन्धिखर्क नगरपालिका–१ का किसानका लागि उपलब्ध गराइएको अनुदानको मल जथाभावी बिक्री गरेको आरोपमा एक एग्रोभेट सञ्चालकलाई प्रहरीले नियन्त्रणमा लिएको छ।
जिल्ला प्रहरी कार्यालय अर्घाखाँचीले सन्धिखर्क नगरपालिका–१ शान्ति बगैँचास्थित नयाँ नेपाल एग्रोमार्ट का सञ्चालक युवराज पौडेल लाई बुधबार राति आफ्नै एग्रोभेटबाट पक्राउ गरेको जनाएको छ।
किसानलाई वितरण गर्नका लागि ल्याइएको अनुदानको मल अनियमित रूपमा बिक्री गरेको भन्ने सूचनाका आधारमा प्रहरीले उनलाई नियन्त्रणमा लिई अनुसन्धान अघि बढाएको हो।
प्रहरीका अनुसार घटनाबारे थप अनुसन्धान गर्न जिल्ला अदालतबाट एक दिनको म्याद थप गरी अनुसन्धान प्रक्रिया अगाडि बढाइएको छ।
घटनाबारे विस्तृत विवरण संकलन भइरहेको र अनुसन्धानबाट प्राप्त तथ्यका आधारमा थप कानुनी प्रक्रिया अघि बढाइने जिल्ला प्रहरी कार्यालय अर्घाखाँचीले जनाएको छ।
