नेपाली बजारमा शुक्रबार सुनको मूल्य वृद्धि भएको छ। नेपाल सुनचाँदी व्यवसायी महासंघका अनुसार शुक्रबार छापावाल सुनको मूल्य प्रतितोला २ लाख ९९ हजार ९०० रुपैयाँ पुगेको हो।
सुनसँगै चाँदीको मूल्यमा पनि वृद्धि भएको छ। महासंघका अनुसार चाँदीको मूल्य आज प्रतितोला १२० रुपैयाँले बढेर ५ हजार २७५ रुपैयाँ पुगेको छ।
यो मूल्य अघिल्लो दिनको तुलनामा १ हजार ३०० रुपैयाँले बढी हो। बिहीबार सुन प्रतितोला २ लाख ९८ हजार ६०० रुपैयाँमा कारोबार भएको थियो। त्यस्तै, आज १० ग्राम सुनको मूल्य २ लाख ५७ हजार ११५ रुपैयाँ कायम गरिएको छ।
अन्तर्राष्ट्रिय बजारमा डलरको स्थिति र भू-राजनीतिक परिस्थितिका कारण बहुमूल्य धातुको मूल्य बढिरहेको विश्लेषण गरिएको छ। आज अन्तर्राष्ट्रिय बजारमा सुन प्रतिऔँस ४ हजार ७१५ अमेरिकी डलर र चाँदी प्रतिऔँस ७९ अमेरिकी डलरमा कारोबार भइरहेको छ।
अन्तर्राष्ट्रिय बजारमा देखिएको यो बढोत्तरीको सिधा असर नेपाली बजारमा परेको हो, जसले गर्दा स्थानीय बजारमा सुनको भाउ प्रतितोला ३ लाख रुपैयाँको मनोवैज्ञानिक विन्दुलाई छुनै लागेको छ।
