- गगन थापाले जलवायु परिवर्तनको मुद्दालाई नेपालको विकासको मुख्य एजेण्डा बनाउनुपर्नेमा जोड दिनुभयो।
- सामाजिक न्याय र मानव कल्याणलाई समेट्न नसक्ने विकास अर्थहीन हुने उहाँको भनाइ छ।
- वीपी कोइरालाका दूरदर्शी विचार र प्राकृतिक स्रोतको संरक्षणलाई आधार मानेर काँग्रेस अघि बढ्ने उहाँले बताउनुभयो।
साउन ६ गते प्रकाशित समाचार नेपाल प्रेसखबर
नेपाली काँग्रेसका सभापति गगनकुमार थापाले जलवायु परिवर्तनको विषयलाई मुलुकको विकासको मुख्य एजेण्डा बनाउनुपर्ने बताउनुभएको छ ।
वीपी कोईरालाको स्मृति दिवसका अवसरमा बुधवार ललितपुरमा आयोजित ‘जलवायु परिवर्तन र वीपीको विचार’ विषयक छलफल कार्यक्रममा बोल्दै उहाँले यस्तो बताउनुभएको हो । सभापति थापाले वीपी कोईरालाले तत्कालीन समयमा ‘समावेशी’ शब्दको प्रयोग नगरे पनि व्यवहारतः त्यसको सफल अभ्यास गरेको स्मरण गर्नुभयो ।
विकासको अवधारणाबारे चर्चा गर्दै उहाँले सामाजिक न्याय, मानव कल्याण र नैतिक जिम्मेवारी विनाको विकास अर्थहीन हुने उल्लेख गर्नुभयो । वीपी कोईरालाले धेरै वर्षअघि नै वनको राष्ट्रियकरण र प्राकृतिक स्रोतमाथि न्यायपूर्ण पहुँचको विषय उठाएको स्मरण गर्दै थापाले ती दूरदर्शी विचारहरूलाई वर्तमान समयमा पनि आत्मसात गर्नुपर्ने बताउनु भयो । पार्टीको आगामी कार्यदिशाबारे प्रष्ट पार्दै सभापति थापाले आजको नेपाली काँग्रेस भविष्यप्रति आशावादी रहेको तर भविष्यको मार्ग कोर्न इतिहासबाट सिक्न जरुरी रहेको बताउनु भयो । अग्रजहरूले देखाएको बाटो र उहाँहरूका विचारलाई आधार मानेर जलवायु परिवर्तनको मुद्दालाई विकासको मूल प्रवाहमा जोड्न प्रतिवद्ध रहेको बताउनु भयो
त्यसैगरी विकासका मुद्दाका सन्दर्भमा पनि अघि यहाँ भएको चर्चा म सुनिरहेको थिएँ । जब तपाईं विकासको कुरा गर्नुहुन्छ, त्यहाँ सामाजिक न्यायलाई छोड्नुभयो भने, मानव कल्याणलाई छोड्नुभयो भने, लोककल्याणलाई छोड्नुभयो भने, नैतिक अधिकार र नैतिक जिम्मेवारीका विषयलाई छोड्नुभयो भने, दूरदर्शिताको विषयलाई छोड्नुभयो भने, तथा विकास दिगो हुन्छ कि हुँदैन भन्ने प्रश्नलाई बेवास्ता गर्नुभयो भने, त्यस्तो विकासको कुनै अर्थ हुँदैन । धेरै वर्षअघि नै विकासका बारेमा बिपी कोइरालाले चर्चा मात्र गर्नुभएन, आफैँ अभ्यास पनि गर्नुभयो ।
वीपी कोईरालाको पालामा वनको राष्ट्रियकरण गर्नुपर्छ, प्राकृतिक स्रोतहरू–चाहे वन होस् वा भूमि–माथि न्याय हुनुपर्छ, तिनलाई न्यायको दृष्टिले हेर्नुपर्छ भन्ने सोच विकसित गरिएको थियो । तर हामी बिपीका अनुयायीहरूले धेरै पछि विकासको प्रतिस्पर्धामा लागिरहँदा ती विषयहरू बिर्सियौँ । आज नेपाली काँग्रेस अगाडि हेर्न चाहन्छ । आज यहाँ उपस्थित सबै साथीहरू भविष्यप्रति र नेपाली काँग्रेसप्रति विश्वास लिएर आउनुभएको छ । तर भविष्यतर्फ पाइला चाल्दै गर्दा हामीलाई थाहा छ, वर्तमानमा इमानदार हुनुपर्छ। र सिक्नका निम्ति हामीले विगततर्फ फर्केर पनि सिक्नुपर्छ । हाम्रा अग्रजहरूले देखाउनुभएका मार्ग र विचारबाट धेरै कुरा सिक्न बाँकी छ । जलवायु परिवर्तनको विषयलाई हामी नेपालको विकासको एउटा मूल विषय बनाउन चाहन्छौँ ।
त्यसका निम्ति हामी आफ्नै अग्रजहरूले हिजो राख्नुभएका विचार र गर्नुभएका निर्णयहरूलाई एकपटक फेरि फर्केर हेर्न चाहन्छौँ । यही सोचका साथ जननायक विपी कोईरालाको स्मृति दिवसका अवसरमा आज युवा साथीहरू तथा आ–आफ्नो क्षेत्रमा अनुभव प्राप्त गर्नुभएका विज्ञ साथीहरूलाई बोलाएर छलफल ग¥यौं । यस छलफलबाट पार्टीले धेरै ज्ञान र अनुभव प्राप्त गरेको छ । यी विषयहरूलाई हामी उपयुक्त समयमा उपयुक्त ठाउँमा उठाउँदै पनि जानेछौँ र व्यवहारमा पनि कार्यान्वयन गर्दै जानेछौँ ।’
सभापति थापाले प्राप्त सुझाव र ज्ञानलाई पार्टीले नीतिगत तहमा उपयोग गर्दै लैजाने समेत प्रतिवद्धता जनाउनु भयो ।
