- देशभर मनसुनको न्यून चापीय रेखाका कारण सामान्य बदली भई केही स्थानमा वर्षा भइरहेको छ।
- दिउँसो र राति देशका विभिन्न पहाडी तथा तराईका क्षेत्रमा भारी वर्षा र हिमपातको सम्भावना छ।
- पहिरो र डुबानको जोखिम रहेकाले सतर्कता अपनाउन मौसम पूर्वानुमान महाशाखाले आग्रह गरेको छ।
नेपाल प्रेस खबर संवाददाता अमित खनाल काठमाडौ ;
हाल मनसुनको न्यून चापीय रेखा पश्चिममा सरदर स्थानभन्दा केही माथि नेपालको तराई भूभाग नजिक र पूर्वमा सरदर स्थान आसपास रहेको छ।
जसको प्रभावले देशभरमा साधरणतया बादल लागेको छ । कोशी, बागमती, गण्डकी र लुम्बिनी प्रदेशको थोरै स्थान र मधेस, कर्णाली र सुदूरपश्चिम प्रदेशको १-२ स्थानमा हल्कादेखि मध्यमसम्मको वर्षा भइरहेको छ।
आज दिउँसो कोशी र बागमती प्रदेशको हिमाली भू~भाग, कोशी, बागमती, गण्डकी, लुम्बिनी र कर्णाली प्रदेशको पहाडी भू~भागका साथै लुम्बिनी प्रदेशको तराई भू~भागका १-२ स्थानमा भारी वर्षाको सम्भावना रहेको छ। साथै देशका हिमाली भू~भागका थोरै स्थानहरूमा मेघगर्जन र चट्याङसहित मध्यम वर्षाका साथै हिमपातको समेत सम्भावना रहेको छ।
विशेष गरी राति गण्डकी, लुम्बिनी र कर्णाली प्रदेशका हिमाली, पहाडी तथा तराई भू~भागका १-२ स्थानमा भारी वर्षाको सम्भावना रहेको छ। रातिको समयमा पनि हिमाली भू~भागका थोरै स्थानमा मेघगर्जन र चट्याङसहित मध्यमसम्मको वर्षा र हिमपातको सम्भावना कायमै रहनेछ। देशका विभिन्न स्थानमा भारी वर्षा, मेघगर्जन र चट्याङको सम्भावना रहेकाले पहाडी भू~भागमा भू~क्षय, पहिरो तथा तराई क्षेत्रमा डुबानको जोखिम हुनसक्ने हुँदा आवश्यक सतर्कता अपनाउन महाशाखाले अनुरोध गरेको छ।
