गुरुदेव खनाल अर्घाखाँची।
प्युठानको गौमुखी गाउँपालिकाबाट हालै मात्र सरुवा भई अर्घाखाँचीको छत्रदेव गाउँपालिकामा प्रमुख प्रशासकीय अधिकृतका रूपमा पदबहाली गरेका तुल्सिराम पौड्याल अख्तियार दुरुपयोग अनुसन्धान आयोग (अक्तियार) को नियन्त्रणमा परेका छन्।
उनी केही वर्षअघि कपिलवस्तुको मायादेवी गाउँपालिकामा लेखा अधिकृतका रूपमा कार्यरत रहँदा ठूलो रकम हिनामिनासम्बन्धी आरोपमा अनुसन्धान हुँदै आएको थियो। सोही प्रकरणमा निरन्तर प्रक्रिया अघि बढ्दै जाँदा हिजो उनलाई आयोगले पक्राउ गरेको पुष्टि भएको छ।
घटनाबारे थप जानकारीका लागि छत्रदेव गाउँपालिकाका सूचना अधिकृतसँग सम्पर्क गर्दा,
उहाँले “चार–पाँच दिनअघिदेखि बिदामा हुनुहुन्छ, अफिसमा हुनुहुन्न” भन्ने जानकारी मात्र दिएको बताइएको छ।
यस घटनापछि छत्रदेव गाउँपालिकामा प्रशासनिक कामकाजमा प्रभाव पर्ने, साथै स्थानीय तहमा सुशासन र पारदर्शिताबारे नयाँ प्रश्नहरू उठेको देखिएको छ। अक्तियारले भने पौड्यालविरुद्धको अनुसन्धानलाई आवश्यक कानुनी प्रक्रिया अनुसार अघि बढाउने जनाएको छ।
