एमाले निकट कन्टेन्ट क्रिएटर विवेक थपलियाले जाँचबुझ आयोगको प्रतिवेदन सार्वजनिक नहुनुमा नयाँ राजनीतिक शक्तिहरूको विवादास्पद छवि मुख्य कारण रहेको दाबी गरेका छन् । टिकटकमा एक भिडियो सार्वजनिक गर्दै उनले प्रतिवेदनले नयाँ उदाएका शक्तिहरूलाई राजनीतिक दलभन्दा पनि ‘आपराधिक संगठन’ (Criminal Organization) को रूपमा चित्रण गरेको जिकिर गरेका हुन् ।
उनका अनुसार प्रतिवेदन सार्वजनिक गर्दा समाजमा ‘बबन्डर’ मच्चिने र नयाँ भनिएका शक्तिहरूको साख समाप्त हुने स्थिति देखिएकाले निर्वाचनको मुखमा यसलाई गोप्य राखिएको हो । “जाँचबुझ आयोगको निष्कर्षले अहिलेको नयाँ शक्तिलाई राजनीतिक संस्था मान्ने कि आपराधिक समूह भन्नेमा ठुलो द्विविधा खडा गरिदिएको छ,” उनले भनेका छन्, “प्रतिवेदन सार्वजनिक भएमा ती दलका अधिकांश व्यक्तिहरू जेल जानुपर्ने र उनीहरू षडयन्त्रकारी रहेको पुष्टि हुने देखिएको छ ।”
एमाले अध्यक्ष केपी शर्मा ओलीलाई जोगाउन प्रतिवेदन रोकिएको भन्ने बजारिया हल्लाको खण्डन गर्दै उनले वास्तविक कारण अर्कै रहेको बताए । ओलीलाई कतैबाट पनि दोषी देखाउन नसकिएको अवस्थामा एमालेलाई चुनावमा फाइदा हुने डरले विपक्षीहरूले फरक व्याख्या गरिरहेको उनको तर्क छ ।
ती कन्टेन्ट क्रिएटरले प्रतिवेदनले नयाँ शक्ति भनिएकाहरूलाई गम्भीर संकटमा पार्ने दाबी गर्दै थपे, “निर्वाचनपछि यसको वास्तविकता बाहिर आउनेछ । त्यसपछि अहिले देखिएका कतिपय नयाँ शक्तिहरू राजनीतिक रूपमा समाप्त हुने वा गायबै हुने अवस्था आउन सक्छ ।”
आयोगका सदस्यहरूमाथि बाह्य दबाब र विभिन्न पक्षबाट सम्पर्क गरिएको हुन सक्ने संकेत गर्दै उनले चुनावको मुखमा शान्ति सुरक्षा र राजनीतिक सन्तुलन कायम राख्न प्रतिवेदन रोकिएको दाबी समेत गरे । उनले यो विषयलाई निर्वाचनपछिको ठुलो राजनीतिक घटनाक्रमका रूपमा व्याख्या गरेका छन् ।
