सिन्धुली–२ मा नेपाली कम्युनिस्ट पार्टीका आधिकारिक उम्मेदवार विरुद्ध बागी उम्मेदवारी दिएपछि संयोजक पुष्पकमल दाहाल प्रचण्डले नेता हरिबोल गजुरेल, महेश्वर दाहाल लगायत नेताहरूलाई काठमाडौँ बोलाएका छन् ।
जिल्ला कार्यदलभन्दा बाहिरबाट सिफारिस भएका लेखनाथ दाहाललाई उम्मेदवार बनाएकामा असन्तुष्ट देखिएका महेश्वरले माघ ६ गते बागी उम्मेदवारी दर्ता गराएका थिए । साविक माओवादी केन्द्रको कोशी प्रदेशका इन्चार्ज समेत रहेका गजुरेलकै प्रस्तावमा प्रेस सेन्टर नेपालका संस्थापक अध्यक्ष समेत रहेका महेश्वरले बागी उम्मेदवारी दिएपछि विवाद चर्किएको छ ।
निर्वाचन आयोगले उम्मेदवारी फिर्ता लिने समय भोलि(शुक्रबार) अपराह्नसम्म तोकेको छ । तर प्रचण्डसँग असन्तुष्ट रहेका गजुरेलले उम्मेदवारी फिर्ता नलिने बताएका छन् ।पछाडि हटे भिर अगाडि बढे पहरा छ ।
हामी अप्ठ्यारोमा छौँ । जिल्ला कार्यदलले सिफारिस नै नगरेका व्यक्तिलाई नेतृत्वले उम्मेदवार बनायो । हामीसँग सल्लाह नै नगरी बाहिरका व्यक्तिलाई टिकट दिएपछि, त्यसको प्रतिरोध गरेका हौँ’, उनले भने ।यसै विषयमा प्रचण्डसँग सल्लाह गर्न अहिले काठमाडौँ जाने तयारीमा रहेको गजुरेलले जानकारी दिए ।‘प्रचण्डले बोलाउनुभएको छ । छलफल गर्नका लागि हामी काठमाडौँ जाँदै छौँ’, उनले भने ।
गजुरेलका अनुसार सिन्धुली–२ बाट पहिलो नम्बरमा प्रचण्ड, दोस्रोमा गजुरेल, तेस्रोमा पानीराज वम्जम, चौथोमा महेश्वर दाहाल, पाँचौँमा अनिता राई र जेनजीबाट सुमन राना सिफारिस भएका थिए । टिकट पाएका दाहाल क्षेत्र नम्बर १ बाट सिफारिस भएको उनले बताए ।
