खाँचीकोट भगवती मन्दिरमा फुलपाती भित्र्याए सँगै स्थानीय क्षेत्रमा दशैँको रौनक

अर्घाखाँची । अर्घाखाँचीको ऐतिहासिक तथा धार्मिक महत्त्व बोकेको खाँचीकोट भगवती मन्दिरमा बडादशैँको सातौँ दिन आज (शनिबार) विधिपूर्वक तथा धुमधामका साथ फूलपाती भित्र्याइएको छ।
परम्परागत धार्मिक विधिअनुसार बाजागाजासहित स्थानीयवासीको उपस्थितिमा फूलपाती भित्र्याइएको हो। फूलपाती भित्र्याउने क्रममा मन्दिर परिसरमा धार्मिक उत्साह र उल्लास देखिएको थियो।
नेपाली हिन्दू धर्मावलम्बीहरूको महान् पर्व बडादशैँअन्तर्गत फूलपातीको विशेष धार्मिक तथा सांस्कृतिक महत्त्व रहेको छ। यस दिन दुर्गा भवानीको पूजाआराधना गर्दै फूलपाती भित्र्याउने परम्परा रहिआएको छ।
खाँचीकोट भगवती मन्दिरमा सम्पन्न फूलपाती भित्र्याउने कार्यक्रमले स्थानीय धार्मिक आस्था, सांस्कृतिक पहिचान तथा परम्पराको संरक्षणमा महत्त्वपूर्ण योगदान पुर्‍याएको छ। स्थानीयवासीको सहभागिताले पुस्तौँदेखि चलिआएको धार्मिक तथा सांस्कृतिक परम्परालाई निरन्तरता दिन थप प्रेरणा दिएको छ।
बडादशैँको अवसरमा खाँचीकोट भगवती मन्दिरमा फूलपाती भित्र्याइएसँगै स्थानीय क्षेत्रमा दशैँको धार्मिक रौनक थपिएको छ।