- यस वर्षको प्रि–मनसुनमा विगत ४५ वर्षयताकै सबैभन्दा धेरै ३३९ दशमलव ७ मिलिमिटर वर्षा मापन भएको छ।
- जलवायु परिवर्तन र वायुमण्डलीय प्रभावका कारण यसपालि प्रि–मनसुन समयभन्दा पहिले नै सक्रिय भएको छ।
- मुख्य मनसुनमा औसतभन्दा कम वर्षा भए पनि छोटो समयको अत्यधिक वर्षाले विपद्को जोखिम बढाएको छ।
यसपालिको प्रि–मनसुनमा ४५ वर्षयताकै धेरै वर्षा मापन भएको छ । प्रि–मनसुन सिजनमा नेपालमा औसत २२६ दशमलव ३ मिलिमिटर पानी पर्ने गर्छ । तर यस वर्ष औसतको १४५ दशमलव ५ प्रतिशत अर्थात् ३३९ दशमलव ७ मिलिमिटर वर्षा भएको जल तथा मौसम विज्ञान विभागले जनाएको छ ।
विभागले सन् १९८१ देखि १२६ वटा वर्षामापन केन्द्रको तथ्याङ्कलाई आधार मानी प्रि–मनसुनको विश्लेषण गर्दै आएको छ । यसअघि प्रि–मनसुनको समयमा औसतभन्दा माथि सबैभन्दा धेरै पानी सन् १९९० मा परेको रेकर्ड गरिएको थियो ।
अहिलेको वर्षाले सन् १९९० को रेकर्डलाई पनि तोडेको छ । यसरी हेर्दा नेपालमा प्रि–मनसुनको विश्लेषण शुरू भएयताकै सबैभन्दा धेरै पानी परेको हो । यसअघि सन् २०२१, २०२०, २००० र १९९० मा पनि प्रि–मनसुनमा ३१५ मिलिमिटरभन्दा धेरै पानी परेको थियो ।
जलवायु परिवर्तनको असर र वायुमण्डलीय प्रभावका कारण यस वर्ष प्रि-मनसुन समयमै सक्रिय भई औसतभन्दा बढी वर्षा भएको मौसमविद्हरूको भनाइ छ । प्रि-मनसुनमै यति धेरै वर्षा भएपछि यसले आगामी मुख्य मनसुनको समयमा पर्न सक्ने असरबारे सजग रहनुपर्ने संकेत समेत गरेको छ ।
यस वर्षको मनसुनमा देशभर सरदर भन्दा कम वर्षा र बढी गर्मी हुने पूर्वानुमान छ । यस वर्षको मनसुन अवधिमा औसतभन्दा कम वर्षा हुने पूर्वानुमान गरिए पनि त्यसले विपद्को जोखिम भने कम नहुने विज्ञहरुले बताएका छन् । उनीहरूका अनुसार छोटो अवधिमा हुने अत्यधिक वर्षा, बढ्दो तापक्रम र पानीको अभावले यो वर्षको मनसुन अझ खतरनाक बन्न सक्ने आशंका छ ।
