काठमाडौं । चिनियाँ बायुसेवा कम्पनी सिचुवान एयरलाइन्सले पोखरा अन्तर्राष्ट्रिय विमानस्थलबाट अस्ट्रेलियासम्म नियमित उडानका लागि नेपाल नागरिक उड्डयन प्राधिकरणसँग अनुमति मागेको छ। एयरलाइन्सले छेन्दु हुँदै अस्ट्रेलिया उडान गर्ने योजना सहित अनुमति मागेको प्राधिकरणका सूचना अधिकारी ज्ञानेन्द्र भूलले जानकारी दिए।
उनका अनुसार प्रारम्भिक अनौपचारिक छलफल भइसकेको छ र छिट्टै आवश्यक प्रक्रिया पूरा गरी औपचारिक रूपमा अनुमति दिने तयारी भइरहेको छ। सिचुवान एयरलाइन्सले सेप्टेम्बर महिनाबाट उडान सुरु गर्ने लक्ष्य लिएको बताइएको छ।
यसअघि सिचुवान एयरलाइन्सले २०८० असारमा पोखरा विमानस्थलमार्फत चार्टर उडान सञ्चालन गरिसकेको छ। ‘नेपाल–चाइना फ्रेन्डसिप ड्रागन बोट रेस फेस्टिभल २०२३’ का अवसरमा चिनियाँ खेलाडी तथा पर्यटक ल्याउन–लैजान उक्त एयरलाइन्सले पोखरा उडान गरेको थियो।
हाल पोखरा अन्तर्राष्ट्रिय विमानस्थलमा हिमालय एयरलाइन्स मात्र नियमित उडान गरिरहेको छ। हप्तामा एक दिन काठमाडौं–ल्हासा–पोखरा मार्गमा उडान भैरहेको छ। यदि सिचुवान र भूटान एयरलाइन्सले पनि नियमित उडान सुरु गरेमा विमानस्थल अझै चलायमान हुने प्राधिकरणको विश्वास छ।
राष्ट्रिय गौरवको आयोजनाका रूपमा निर्माण भएको पोखरा अन्तर्राष्ट्रिय विमानस्थल विसं २०७९ पुस १७ गते उद्घाटन गरिएको थियो। झन्डै २२ अर्ब लागतमा बनेको यो विमानस्थलमा दुई हजार ५०० मिटर लम्बाइ र ४५ मिटर चौडाइको धावनमार्ग छ, जसले वार्षिक आठ लाख यात्रुलाई सेवा दिन सक्ने क्षमता राख्छ।
